吳安儀誓保四眼look

無論平日生活定係喺桌球枱上搏殺,兩屆世界業餘錦標賽冠軍吳安儀都離唔開佢嘅Icon眼鏡!即使為咗今次訪問,我哋搵嚟星級形象指導幫佢擺脫「四眼Look」兼執到靚一靚,但自認貪靚嘅安儀卻無意放低眼鏡:「因為我驚做激光矯視會影響桌球表現,唔做『四眼妹』都係等退役先諗!」

唔少電影、電視橋段,都有「四眼妹」除低眼鏡當堂變索女嘅情節,令「四眼妹」一詞被標籤成負面。而從小學開始,安儀已經係「四眼妹」一名,但佢就話從來唔介意呢個花名:「比起『四眼妹』,畀人叫做『肥妹』咪仲唔開心!」

上妝效果眼前一亮

雖然安儀認為「四眼」未必唔靚,但今次訪問我哋請嚟星級形象指導Akira幫佢擺脫「四眼Look」,即時索爆兼令人眼前一亮。連Akira都大讚咁話:「大致上佢嘅五官都算幾端正,所以除咗眼鏡之後,打個眼影、輕輕畫條眼,已經可以使佢雙眼明亮有神好多。之後再修埋堂眉就令面部輪廓更加突出,而且佢嘅皮膚質素都唔錯,令上妝效果幾靚,我覺得佢都有明星相o架!」

縱然除鏡後效果良好,但自認貪靚嘅安儀表示仍會維持佢嘅招牌「四眼Look」:「我近視有600度,散光有400,所以戴唔到隱形眼鏡,唯一唔做『四眼妹』方法就係激光矯視。不過,做呢個手術會有風險,如果稍有差池而影響視力,會直接影響到我運動員生命,尤其係桌球係講求眼界準繩,我絕對唔會為求貪靚而冒呢個險!反而退役後就可以考慮、考慮!」當講到香港唔少運動員退役後都投身做空姐,安儀即刻有反應:「咪係囉!做空姐唔畀戴眼鏡o架!」

怕激光矯視有風險

被問到「四眼Look」會唔會阻礙喺桌球枱表現,安儀就話:「咁一定係唔戴眼鏡會最好,但依家逼住戴都習慣晒,但我會專登配一副無框眼鏡,咁視域會廣好多;另外亦要有可調校嘅鼻托,方便打波時『瞄波』!雖然我唔怕戴眼鏡,但會怕爛眼鏡,所以一定會帶定後備鏡喺身,以防自己『盲摸摸』!」

吳安儀

年齡:22歲

身高:1米66

體重:58公斤

威水史:2010年亞運團體賽金牌兩屆世界業餘錦標賽冠軍

圖、文:司徒子文