祖高域發威塞國逆轉加拿大入決賽
祖高域恨再贏「網球世界盃」！台維斯盃4強生死戰由塞爾維亞對加拿大一役要鬥足5場先分出高下，結果塞國喺「一哥」祖高域「救命」，加上「眼鏡俠」帖沙華域尾場奠勝，4年來第2次殺入決賽，將與捷克爭霸，祖高域坦言贏台盃嘅興奮程度，比捧大滿貫有過之而無不及。
一度落後場數1比2嘅塞爾維亞，壓軸賽日派出祖高域對戰加拿大重炮華安歷，在許勝不許敗情況下，祖高域不負主場一萬名擁躉期望，贏盤數3比0扳平。接住「眼鏡俠」帖沙華域再以3比0勇挫普斯皮施爾，塞爾維亞全隊上下開心到相擁慶祝勝利。陣中「大佬」祖高域High爆話：「台維斯盃好比足球壇嘅世界盃，猶記得2010年時我哋贏咗，畀到我哋極大力量及信心。」
澳洲下屆重返世界組
塞爾維亞喺11月15日展開嘅總決賽主場強戰捷克，祖高域希望笑到最後：「我贏過幾次大滿貫，但喺台維斯盃同隊友並肩作戰，共享勝利後呢份喜悅，冇其他嘢比得上。」
值得一提的是，澳洲終於從衰落的下坡反彈，呢支28屆冠軍憑湯美表現出色，喺4場較量中以3比1領先波蘭，相隔6年後，下屆回歸世界組作賽。