勒邦占士（LeBron James）可以話係善心爆棚，繼年頭捐出100萬美元（約775萬港元）為母校聖文森聖瑪利高中翻新體育館後，這位熱火球星今個夏天繼續作出回饋，免費為母校的戰鬥愛爾蘭人美式足球隊贊助全副裝備，昨日更親自上陣於學校運動場擔任Model，占士呢位「大師兄」都可算唔話得咯！
每年都會返家鄉阿克倫市的「大帝」表示：「重返母校嘅感覺真係好正，能夠為一班師弟作出貢獻，對我嚟講真係意義重大！」
將會率領熱火力爭「三連霸」的占士，向《太陽哨兵報》坦言新球季最忌就係上季東岸決賽對手溜馬及粒粒皆星的籃網，故近日已找體能教練提早開操，日前更癲到徒手拖行迷你卡車練臂力，訓練真係非常刻苦，可見「大帝」對挑戰「三連霸」的決心。