女拳霸頂峰對決

拳迷睇泰拳，本來只係睇拳手之間力量、技術同意志對決，不過七月三十日假九龍灣國際展貿中心舉行嘅「THE ONE世界拳王終極之戰」，除咗睇拳，大家將有機會一睹艷絕泰拳界嘅羅蘭妮Laurene Maryse在擂台獻技，廣大拳迷到時記得落足眼力，望清楚呢位法國拳后有幾索。

羅蘭妮擺起架式，何止有板有眼，直情係功架十足。

羅蘭妮現年23歲，15歲學泰拳，後來跟隨前世界冠軍Karen Ousey學拳，就立志要成為世界拳后，至於點解學泰拳，原來因為求學時期遇上校園欺凌，佢話：「當年我由法國到英國留學，當時好慘，同學成日欺負我，因此我去學自衞術，開始學習泰拳。」

7 ．30九龍灣展貿獻技

受師傅影響，羅蘭妮瘋狂愛上泰拳運動，畢業後一直保持練習，06年開始在英國打業餘賽，兩戰取得一勝一和，之後轉打職業賽，更索性前赴泰國曼谷定居，3年前開始踏足泰國擂台與當地高手對戰。過去3年羅蘭妮共上陣24場，錄得12勝12負，勝出率50%。早前5月底在柬埔寨上陣，與對手激戰5回合後，憑點數獲勝贏得金腰帶。