NBA 3子極速冧爆Fans
每年夏天，不少NBA球星皆遠渡重洋搶灘中國，無論係大牌球星或嶄露頭角的球員，都希望打開中國市場，從而增加自己的人氣。巫師主將約翰禾爾（John Wall）、拓荒者新星列拿特（Damian Lillard）同灰熊射手康利（Mike Conley）亦深明此道，所以昨日於廣州出席宣傳活動時，對球迷合照來者不拒，務求以「親民政策」替自己打開中國市場，為未來鋪路。
約翰禾爾、列拿特及康利均以快速打法見稱，今次廣州行亦貫徹作風，以極速冧爆Fans，甫到埗就在「隻抽」Tee上簽名向本報讀者問好，祝各位有個愉快夏天，認真識撈。三人其後現身贊助商宣傳新產品，吸引近400位球迷到場，場面非常熱鬧。
禾爾「紮馬」搶鏡 康利Chok爆
當中於去季榮膺新人王的拓荒者新星列拿特最識搶鏡，全程Natural High由頭Chok到尾，一見記者舉高相機就自動波猛扮型仔。2010年狀元禾爾亦「唔執輸」，失驚無神於喇叭前面「紮行馬」手舞足蹈，反觀灰熊控衞康利就選擇在靚女球迷側邊「低調Chok」，三大NBA球星各有各Chok。其後三人更親自落場向年輕學員傳授籃球絕技，約翰禾爾與康利為答謝球迷熱情支持，更「識做」地即席比試三分球，球迷自然睇到拍爛手掌。
被問到中、美球迷有何不同，約翰禾爾就指兩地球迷一樣熱情，但對中國球迷如此熟悉他們感到非常驚訝，康利則表示：「最大的不同是我們並不常來，中國球迷很難有機會見到我們，所以希望今次廣州行能為Fans帶來美好回憶。」
列拿特轉飛台灣宣傳
約翰禾爾和列拿特同為紋身愛好者，兩隻手臂都滿布「公仔」，對於早前被評為NBA十大最差紋身之一，約翰禾爾則毫不介意：「我紋身只係因為我自己鍾意，而且只要我唔除衫，其他人都睇唔到我嘅紋身，所以完全冇必要理其他人嘅睇法。」首度訪華的約翰禾爾和康利今次中國之旅到此暫告一段落，而列拿特昨晚已飛往台灣繼續贊助商的活動。
青月廣州直擊