熱火再次封王，「閃電俠」韋迪全場貢獻23分及10個籃板球，可說居功至偉。賽後熱火更衣室內夾雜香檳與吶喊聲，只有韋迪一手握住膝蓋一手抹住眼淚，之後更走出更衣室癱坐在牆邊。
韋迪之後口叼雪茄低頭沉思，突然拿起香檳倒向自己傷痕纍纍的膝蓋。「呢座獎盃都要送畀你哋！」韋迪說時眼淚已不停流下。原來「閃電俠」賽前與自己膝蓋有個「美麗約會」：「今日賽前我同膝蓋傾得唔錯，我話佢知再畀多次比賽機會我，咁樣你哋就會有一個美好的夏天。」
韋迪其後出席記者會時則盡顯霸氣，當記者發問時要求他們一定要稱呼自己為「三冠王」。「由依家開始，我叫三（Three），記住，我叫三冠王。」
除韋迪外，熱火奇兵柏堤亞亦係球隊另一奪冠功臣。早前賽事一度遭雪藏的柏堤亞今仗射入6個三分球貢獻18分，更於完場前48.9秒兩度成功阻止鄧肯投射及補籃，於熱火衞冕總冠軍中扮演重要角色。相比之下，「三巨頭」之一的保殊（Chris Bosh）則完全被比下去，整場賽事一分未得之餘更取得五個犯規，表現令人失望。