NBA總決賽採用七場四勝制，於爭霸路途上以第二場最為關鍵。呢個理論由美國嘅NBA專家提出，大大話話都講咗成五十年。香港時間星期一早上，熱火將會喺主場再鬥馬刺，唔使講都知好睇過戲！
今季兩支決賽球隊嘅共通點係雙方都好少主力球員受傷，Peter唔只一次提及過，傷病問題往往成為球隊爭標阻力，熱火及馬刺都以「夫添」出戰，對球迷嚟講絕對係件好事。睇番第一場對賽，熱火其實打得唔差，但係馬刺班球員實在太有經驗，最終由馬刺成功取得領先優勢。Peter不得不讚吓馬刺主帥普波維治（Gregg Popovich），早早就畀柏加（Tony Parker）及鄧肯（Tim Duncan）等人有充足時間休息，叉足電先至落場比賽，起碼體力上唔會輸蝕。
對熱火嚟講，第二場比賽可謂「Do or Die Game」，唔單止勒邦占士（Lebron James）要保持好狀態，韋迪（Dwyane Wade）及保殊（Chris Bosh）都要加把勁。留意到韋迪動作有少少唔自然，或者傷患未清得晒。保殊投籃就時好時壞，演出相當之反覆。如果佢三位大哥有乜「依郁」累球隊輸埋第二場，到時熱火爭標形勢就相當嚴峻。
最後講番足球，大家都知Peter重返三色台，嚟緊中國主場對荷蘭嘅熱身賽，又會同大家見面咯！球迷們，Let's go rock n'rock！