馬刺奪冠柏加見財化水？
如果大家有印象，應該記得「法國跑車」柏加（Tony Parker）去年夏天曾捲入夜店毆鬥案，並意外被玻璃碎片鎅傷眼角膜。柏加身嬌肉貴，事後自然以「眼傷」為由向夜店索償，但鑑於他今屆季後賽打到「曉飛」，證明意外對其眼部影響不大，若果馬刺最終成功奪冠，柏加的2,000萬美元（約1.55億港元）索償官司隨時敗訴！
全力向創會第5個總冠軍進發的馬刺，於總決賽先下一城砌低熱火，射入絕殺擦板球的柏加可謂居功至偉，奈何今次準繩的投射隨時令該位馬刺球星荷包重創！事緣柏加去年夏天同老友去紐約夜店W.i.P.狂歡，同場兩位當紅歌星Drake及Chris Brown卻因發生爭執繼而「爆樽」，結果玻璃碎片導致柏加的眼角膜撕裂，更一度傳出幾乎會失明。
前妻伊娃預測馬刺贏4比1
猶幸柏加「大步檻過」，但就以「管理疏忽兼未有阻止毆鬥」為由向該夜店索償2,000萬美元。不過，據美媒《TMZ》分析，柏加於季後賽愈戰愈勇反而對這單官司極為不利，因辯方肯定會捉住柏加於Game1的高難度絕殺來狂追猛打，一旦馬刺奪冠而狀態大勇的柏加獲選為總決賽MVP，這2,000萬美元索償相信會凍過水！
姑勿論這單官司結果如何，柏加都要專心應付明早進行的Game2大戰，其前妻伊娃朗歌麗亞（Eva Longoria）賽前就透過twitter為愛隊打氣，預測馬刺可於5場內解決熱火（左小圖），有靚女做後盾加上柏加狀態繼續弗爆，今仗作客受讓5.5分下盤當然捧得過。
（now 635周一早上8時直播）