蘭度夫發熊威雷霆出局
繼首輪季後賽淘汰四號種子快艇之後，「巨人殺手」灰熊昨日又再爆冷，作客以88比84勇挫雷霆，以總比數4比1將該支西岸「一哥」踢出局，創會以來首次躋身西岸決賽。攻入全場最高28分的贏波功臣蘭度夫（Zach Randolph）豪言無懼挑戰勁旅，誓要率領灰熊奪得總冠軍，不過這位惡形惡相的「黑熊」就自爆自己原來最怕貓仔，認真「騎呢」！
靠防守起家的灰熊昨仗靠老大哥普林斯（Tayshaun Prince）封殺雷霆主將杜蘭特（Kevin Durant），後者全場21次起手炒足16球，加上大前鋒蘭度夫肆虐雷霆內線，全場貢獻28分及14個籃板球，帶領球隊作客以4分之差贏波，首次躋身西岸決賽，對手將會係馬刺及勇士的勝方。常規賽時灰熊四鬥馬刺錄得兩勝兩負成績，面對勇士更三戰全勝，難怪蘭度夫賽後豪言要向首個NBA總冠軍進發。
籃壇「壞孩子」居然怕貓
6呎9吋高加上260磅身形的蘭度夫堪稱籃壇「壞孩子」，後生時曾因為私藏失槍及未成年駕駛而被捕，差點前途盡毀。不過，這位天不怕地不怕的「黑熊」原來都有弱點，就係最驚見到貓仔：「我其實有恐貓症，硬係覺得佢哋好邪惡，我好驚畀貓『爪親』，試過有次見到隻貓之後，搞到我仲喊住掉頭走添！」