近期出櫃之風非常盛行，効力NBA球隊巫師嘅中鋒積遜哥連斯（Jason Collins）就透過《體育畫報》雜誌，親自撰文公開自己嘅性取向，成為北美四大體育聯盟當中首位宣布出櫃嘅現役球員。呢個消息昨晨傳出後轟動整個體壇，就連美國總統奧巴馬及以湖人球星高比拜仁（Kobe Bryant）為首的NBA球員，都對積遜哥連斯表示無限量支持。
將成為5月份《體育畫報》雜誌封面人物嘅積遜哥連斯，以「我係一個34歲ＮＢＡ現役中鋒，我係黑人，我係同性戀」為題，展開其剖白性取向文章嘅開端。
積遜哥連斯解釋之所以出櫃，係因為受到早前波士頓馬拉松爆炸案所影響，認為「人生無常，應該誠實活下去」，同時強調自己依然非常熱愛打籃球，希望公開自己嘅性取向後，仍然獲得球員同球迷嘅接受。
積遜哥連斯出櫃消息傳出後，前美國總統克林頓及ＮＢＡ總裁史端（David Stern）都大讚佢非常勇敢，美國總統奧巴馬更親自致電表示支持。
至於一眾ＮＢＡ球星包括「小飛俠」高比、麥基迪（Tracy McGrady）及拿殊（Steve Nash）等，都透過twitter表態支持積遜哥連斯嘅決定。當中「小飛俠」更表示：「為哥連斯感到驕傲，唔好畀其他人嘅愚昧抑壓到自己嘅內心！」