巴塞喺歐聯4強首回合客狂吞拜仁四粒，地上最強招牌被拆，兩屆奧運羽毛球冠軍林丹衝口而出高呼「假波」，令人唔知好嬲定好笑。「超級丹」份人大情大聖，敢愛敢恨，有嗰句講嗰句，依家連唔應該講嗰句都講埋，問你點頂？
試問開波前，有邊個估到巴塞會吞四蛋？波男老友黑柴係德國躉，佢賽前都已經好進取貼拜仁贏，但估波膽都只係夠膽估3比1同4比1，佢話斷估巴塞唔會咁差，就算輸波都會有波入嘅，依家開出拜仁贏4比0嘅波膽，幾乎同「通殺」冇大分別。
雖然「超級丹」將拜仁呢場大勝定性為假波，不過附和嘅人唔多，同意呢場係假波嘅可能只限羽毛球隊隊員，事關舊年倫敦奧運羽毛球賽嘅「假球風波」，大家記憶猶新，林丹身為隊員，分唔出真波同假波都好難怪佢。
拜仁大炒巴塞四粒，情況等如印尼陶菲克或馬來西亞李宗偉大炒林丹「21比0」咁令人難以置信。幸好林丹冇乜留意本地波，否則如果畀佢知道今季得十隊嘅港甲有五隊仲護緊級，更要踢到最後一輪先知邊隊降班嘅話，真係唔知佢又會講乜咯！
波男Style