近日香港球圈怪事連篇，件件都幾十年一遇，先係黑工事件，又例如亞協盃印尼隊扮傷搞到腰斬，仲有個聯賽榜，高峰期有成8隊要護級，仲有三支區隊傳出聯手自降丁組，呢啲咁曲折嘅劇情竟然喺現實中出現，今季聯賽真係搵齊史匹堡同馬田史高西斯都拍唔出！
球圈出現黑工，真係百年難得一見！黑工呢個名詞，令波男諗番起幾十年前嘅外勞地盤散工，有判頭或無良僱主喺糧期之前自己報警，等班黑工畀人拉晒，老闆就連份糧都慳番嗰隻，近代黑工嘅定義較為廣泛，例如你叫屋企個家傭出舖頭幫手，都算係黑工。
勢估唔到，呢單嘢會喺球圈開齋，最頂癮係波總話黑工球員冇違波總例，仲出埋新聞稿話畀大家聽點樣點樣，波總為屬會解困，嗰種義薄雲天連狄龍同發哥都係咁上下！
至於腰斬事件，上輪亞協盃晨曦對印尼佩斯寶，客隊最後得番六個球員在場，令比賽不足法定人數而要腰斬，呢場波令波男諗起兩隻歌，就係《十個救火的少年》，另一隻係《無賴》，由於事件罕見，入場球迷都係歷史見證人，雖然佢哋笑住嗌「回水」，但睇得出佢哋都好滿意咁離場。
至於今年嘅護級形勢，更係複雜到冇朋友，連場護級波仲可以同黑工事件、地區球隊財困、自降丁組呢幾件事撈埋一齊講，直到此時呢刻，仲有人懷疑究竟南區同流浪上咗岸未，如果加埋其他因素，咁就要深藍電腦先計到囉。