Kobe傷出堪比魔術手引退
1991年Peter揸緊車時聽到湖人球星「魔術手」莊遜，因感染HIV病毒宣布退出NBA球壇，當時Peter心裏一沉。22年之後，得悉湖人球員高比拜仁因跟腱撕裂被抬離球場，Peter嘅心情就同22年前一樣沉重。講真，Peter自細就喺洛城長大，對於湖人係有情意結，今季佢哋要為季後賽苦苦掙扎之餘，仲要喺季尾傷埋個主力，Peter真係好大感觸。
湖人今季由頭黑到尾
尋日開住部電腦，見到湖人同勇士場波鬥得咁緊湊，點解都冇高比拜仁嘅數據彈出，當時已心知不妙，及後確實高比拜仁勇戰受傷時，都忍唔住搖頭嘆息。Peter幾十歲人，有乜未見過吖，但我相信有部分湖人粉絲，到今時今日都接受唔到呢個事實。
跟腱位係運動員其中一個死穴，高比拜仁唔單止短時間之內難以復出，來季開咧亦未必可趕及上陣。今次高拜比仁受傷事件令Peter諗起兩個要點。第一係光輝難以永恒，強如湖人都唔例外。呢支冠軍級球隊今季黑過墨斗，新球員經常受傷不特止，就連個老闆都同家人say good bye。依家連標誌性球星都傷埋，真係由頭黑到落腳趾尾。話知你過往有幾輝煌，今季一鋪就同你清袋。
第二係高比拜仁實在太好勝，無疑湖人今季處於下風，但佢死都唔服氣，係都要帶領球隊奪取季後賽入場券。雖然話高比拜仁吃得苦又捱得痛，但佢始終都係血肉之軀，過分拚搏之下導致重傷收場。除高比拜仁性格之外，湖人教練迪安東尼亦冇錫住佢。要知道運動員「生命」有限，係都要用到佢盡的話，對球隊長遠嚟講唔係一件好事。
一句講晒，湖人前景並不樂觀，依家惟有祝願高比拜仁早日康復。