陳敏儀有個小Model
碧咸二囝羅密歐（ROMEO BECKHAM）為英國著名時裝品牌做Model，彈丸之地的香港體壇都有「富二代」進軍國際時裝品牌，香港「長跑皇后」陳敏儀（Maggie）的愛女Summer最近被日本時裝名牌UNIQLO睇中，為該品牌的嬰兒服做模特兒。未滿4歲的Summer充滿陽光氣息，絕對有潛質成為廣告「小天后」。
2000年下嫁盧晉禮移居美國的Maggie，近年隨當美軍的老公Brent到日本服役，專職湊仔的她因一時「貪玩」，結果讓女兒踏上模特兒天橋：「我無諗過要啲細路做模特兒，今次真係無意中見到有間日本AGENT公司招募，仲話可以試造型，咪試玩玩囉，點知佢哋就揀咗Summer，仲一次過接兩個job。」原來除了UNIQLO之外，Summer亦為另一個日本嬰兒服裝Mou jon jon拍攝一系列夏裝，並推出品牌專輯，相當Kawaii（可愛）！
喜愛炎夏 取名Summer
「上唔上鏡我唔知啊！我估因為佢哋鍾意阿囡嘅笑容夠甜啩。我無諗太長遠，如果時間配合，唔影响佢哋上堂，我唔拒絕再畀仔女拍廣告，其實都可以當學多一樣嘢，亦可以畀佢哋留下童真，將來長大後有特別嘅回憶。」不過，想不到這兩次模特兒經驗已經有點嚇怕Summer，敏儀話：「佢以前對住鏡頭笑不停，又好鍾意影相，但近來佢有點討厭鏡頭，有次影全家福仲喊埋出嚟。」敏儀目前有兩子一女，Summer更是孻女，中文名叫盧夏珊，本應中文名想有個「雪」字，紀念她出世時落大雪，但最後敏儀都是喜歡夏天，不想太冰冷。
大仔遺傳 跑步天分
提起三個寶貝，Maggie愈講愈興奮，原來大仔盧天已經九歲，二仔盧峰則是七歲，兩兄弟都喜歡足球及籃球，而妹妹則愛體操，但三個孩子中長子盧天最有機會遺傳她的跑步天分：「佢好鍾意玩球類運動，而教練話佢跑得好快，特別係短距離，但佢話跑步好悶，我唔會強迫佢，玩運動一定要自己願意。」
