余理洋4千萬豪宅做宿舍

曾經為加拿大出戰世界大學生運動會並奪得銀牌嘅Nathan，經港隊代表陳翊麟引薦下，上年以外援身份助南華贏得超級聯賽錦標，而班主洪游奕對佢表現相當滿意，決定同Nathan簽下長約。

由於爸爸係香港移民、媽媽係加拿大人，所以有香港身份證（未有3粒星）嘅余理洋，只需要喺過去3年內居港滿1年，就可以符合「居港球員」資格參戰甲一聯賽。可惜今年賽事註冊期前，Nathan仍未住夠期，惟有坐住「移民監」等下年啦。

呢個無敵景觀就係最值錢嘅賣點。

客廳超級寬敞，啱哂「高人一等」嘅余理洋。

直望維港景觀

縱然暫時無法喺甲一上陣，但洪游奕仍善待Nathan，安排入住佢旗下九龍塘「畢架山峰」1538呎（實用面積1161呎）豪宅。據資料顯示，呢個能夠由九龍塘直望維港嘅高層單位，喺05年一手以2048萬買入。「4房1套另設工人套房」嘅間格，房間同客廳都係長方形，相當「四正」實用，再加埋設有超豪華大堂、露天泳池、皇室會所等設置，兼鄰近又一城商場及港鐵站，難怪到依家已升值一倍接近4000萬，相信全港都好難搵到一間畀運動員嘅宿舍係貴得過佢！故此，Nathan非常感謝球會厚待：「雖然今年錯過咗銀牌同甲一聯賽，但我仍會以外援身份，幫南華喺超級聯賽衞冕，以報答各位！另外，喺呢段時間我會好好咁調整自己，下年正式落場搏殺！」

偏愛旺中帶靜居所

即使依家住緊千呎豪宅，但論面積比起加拿大普遍嘅大屋仍有距離，不過余理洋話反而鍾意香港多啲：「呢度寸金尺土，人口密集，但我鍾意住喺城市嘅感覺。因為喺香港一啲都唔會覺得會悶，任何時候都有舖頭開門、又有嘢食，方便到極。我知道自己住緊嘅地方係好昂貴，相信就係嗰種旺中帶靜，鬧市入面又有開揚景觀嘅特別之處！」

圖、文：司徒子文