林書豪輸牙骹勸人咪賭
全美大學男籃錦標賽（NCAA）的「Sweet 16（16強）」已於周四揭開戰幔，大批NBA球星甚至美國總統奧巴馬都為之着迷。不過，火箭球星林書豪（Jeremy Lin）就勁冇癮，事關佢母校哈佛大學早喺32強出局，日前更因輸掉牙骹戰被迫披上死敵亞利桑那大學嘅Tee，認真瘀爆！
事緣J.Lin上星期同火箭助教美梅斯（Jesse Mermuys）以雙方母校輸賭，落敗一方要着上對方母校嘅Tee被恥笑，結果哈佛不堪一擊，以51比74向亞利桑那俯首稱臣，32強止步。「林瘋」願賭服輸，好唔甘心咁着上亞利桑那大學嘅Tee「示眾」，非常鬱悶。J.Lin事後透過instagram上載佢嘅「黑面相」，更留言：「提醒孩子們，千萬不要賭博！」
深宵練波谷狀態
其實，林書豪近期喺球場內外皆頗為失意，未計今晨對灰熊嘅賽事，J.Lin對上3場平均僅得6分進帳，上陣時間亦被大幅削減。為咗能夠盡快重拾狀態，林書豪選擇深夜加操，更喺twitter上載一張抱住籃球坐喺籃框上思考人生嘅照片，更留言：「深夜練波係一種治愈療法。」
林書豪同火箭近期狀態皆屬一般，火箭明早面對由基斯保羅（Chris Paul）領軍嘅快艇，勢必任人魚肉，快艇作客讓火箭1.5分當然捧上盤。（now 635周日早上8時直播）