姚錦成喊完可以再喊
「7欖」喊上癮？去年「一喊成名」嘅港隊翼鋒姚錦成，今年繼續獲得最愛女友Kelly撐場支持，而阿成亦計劃今年再喊多次；但此喊不同彼喊，因為佢希望今次唔再係傷心失望嘅喊，而係為再度奪冠開心落淚。
父母舊年撐場超感動
上年港隊喺銀盾賽8強賽輸畀日本出局，阿成亦喺全場傳媒鏡頭面前攬住父母爆喊，呢一幕頓成翌日各大報章Headline圖片，亦令佢「一喊成名」。阿成解釋當日爆喊全因父母罕有到場支持：「自細開始玩運動，而且成績都唔錯，做仔嘅梗係想父母可以嚟睇自己比賽啦，可惜多年嚟都未試過。不過，Kelly同師傅一直知道我有咁嘅遺憾，所以上年就瞞住我『偷運』佢哋入場睇波，可惜嘅係嗰場波大好形勢下輸咗，當我失望到極點時竟然睇到父母有到場支持，嗰吓百感交集，於是啲眼淚咪好似決堤咁爆晒出嚟！」阿成話如果當日預先知道父母睇住自己打波，表現一定會更勁！
問到今年父母會唔會再嚟撐場，阿成即刻耍手擰頭：「嗰幾日阿爸要返工，而阿媽上年肯嚟睇波已經好畀面，完咗場波就即刻走，所以今年應該唔會嚟！」縱然阿成係咁講，但佢心入面當然係想父母再嚟支持自己嘅。
爭出線銀盃賽創歷史
其實呢個7欖賽對阿成嚟講有特別意義，2010年首次入選就有「達陣」攞分兼助港隊捧走銀盾。其後佢屆屆都有「達陣」，今年第4度參賽當然想再嘗冠軍滋味：「如果分組賽可以攞到前兩名，能夠歷史性角逐最高榮譽嘅銀盃賽8強；又或者贏到銀碗、銀碟、銀盾冠軍，到時我一定會因為開心而再喊一次！」
港隊喺小組賽與斐濟、加拿大及西班牙同組，今午鬥斐濟一場非常難打，所以阿成寄望明日對加拿大同西班牙可以贏晒兩場，以完成出線銀盃嘅歷史使命！
姚錦成小檔案
洋名：Salom
年齡：25歲
身高：1米82
體重：82公斤
威水史：2012年亞洲巡迴賽冠軍，2010年國際7人欖球賽銀盾冠軍
圖／文：司徒子文、青月