即將喺「國泰航空／滙豐香港國際七人欖球賽」作處子登場嘅李卡度，直言呢個賽事現場氣氛澎湃，「睇電視機畫面係感受唔到嗰種震撼！」今屆港隊經抽籤後，喺小組賽需要與斐濟、加拿大及西班牙同組，Cado就形容有幸有不幸：「第一場就要對住超級勁旅斐濟，我哋會抱住學習心態嚟打。但之後對加拿大同西班牙就唔同講法，因為佢哋都只係啱啱入到種子隊，以港隊實力應該可以一拚，再加上主場四萬人打氣，我會去到盡嚟答謝球迷。」
啱啱喺專教院運動管理及訓練學畢業嘅梁曉儀，原來中學年代係跨欄好手，而且擁有女子B Grade 100米欄紀錄到依家仲未有人可以打破。不過，當曉儀升上大專就開始戀上欖球，自稱為「喪跑型」嘅佢被安排打翼鋒，每當接到個波後只需快跑到底線「達陣」便能夠攞分，啱晒呢位「學界欄后」！