李蘊投入7欖Fever

問到Renee點解想學打欖球，佢就話同陳奕迅有關：「我同Eason一樣都係7月27日生日，佢留學英國時已經識打欖球，所以我相信自己都可以有咁嘅天分！況且我知七欖賽聽日就開始，呢個比賽畀我印象係球迷扮鬼扮馬、開心飲啤酒，我都想好似佢哋咁喪玩三日，以最佳狀態迎接首次演出嘅舞台劇《假如我們不是這樣開始》。」Renee話自己每逢一啲重要演出前，都會做運動嚟放鬆心情，所以今次就想打欖球嘞！

為咗李蘊打欖球更易上手，我哋搵咗即將代表港隊出戰「七欖」嘅李卡度（Cado）、同埋前女子代表隊成員梁曉儀做教官。Cado雖然只係「90後」，甚至比起21歲嘅Renee仲後生5個月，但已經有8年打欖球經驗，如果唔係上年有傷在身，早就已經為香港喺「七欖」上陣；女將梁曉儀仲犀利，跑得快嘅佢雖然讀大專嘅時候先接觸欖球，但唔使一年就已經入選港隊集訓名單，潛質相當優厚。

碌來碌去開心忘形

兩位教練都認為Renee應該由淺入深開始接受欖球訓練，於是就先教佢傳接球、踢球同埋假身扭波「入門3招」。雖然李蘊之前冇接觸過欖球，但話晒都係嚟自運動世家（弟弟李昌泳係港青手球代表），所以話咁快就上手。Renee完成基本課程後仲好自滿咁話：「好開心！好好玩！尤其可以喺場入面碌嚟碌去，身邊好多小朋友都玩到忘晒形！我聽過如果做到港隊成員，將可代表香港四圍去唔同地方比賽，令我都好羨慕，再加上我知道曉儀打咗唔夠一年就已經入選，相信如果我肯下多啲苦功，23歲前應該可以代表香港出賽！哈哈！」

圖、文：司徒子文

服裝鳴謝：Kukri