陽光6港女沙欖迎熱浪
每年三月下旬全港都會掀起欖球熱，七人欖球開戰前，港島南區淺水灣泳灘將為欖球狂熱揭開序幕，嚟緊周六、日將上演沙灘嘉年華，重頭戲就係七欖「變種」運動──沙灘欖球，六位本地陽光少女已組隊出戰女子沙欖，約定大家迎接蜂擁而來嘅欖球熱浪。
欖球正規軍無懼老外
六位少女都係香港欖球運動員，大部分仲讀緊書，佢哋分別係任職航空公司地勤嘅陳芷希、就讀城大BBA三年級嘅邵敏燁、心理學二年級嘅陳韻仙、公開大學嘅劉家希及劉詩敏，同埋IVE嘅程子容，成班女仔自行組成一支名為Awesome B-eaches嘅球隊，踩入淺水灣出戰沙欖，挑戰來自世界各地嘅強隊。
陳芷希指出，參加女子沙欖共有八隊，佢哋係唯一嘅純香港女仔（土生土長）隊伍，會同七支外籍女仔球隊交手，她坦言港女同外國人相比，體形同力量都輸蝕，但唔一定會輸：「我哋係欖球正規隊員，合作已有一年，我對我哋嘅技術同合作性都好有信心，對住外隊都唔怕。」
陳韻仙補充，沙欖同普通欖球最大分別係沙地比草地軟熟，可以更加放膽落地，不過亦要小心受傷：「膝部同足踝關節位要特別小心，因為喺沙地落腳，轉身扭動身體時可能會用錯力度，令關節移位。」佢仲話如果大家一時興起想喺沙地一展身手，都要量力而為，避免受傷。
沙欖資多啲
沙灘欖球（Beach rugby）是欖球運動的沙灘版本，在30米乘20米的範圍進行，在法國、意大利及美國已相當盛行，這項運動近年引進香港淺水灣，成為七欖前的熱身賽事之一，同場上演的活動還有擦網球及閃避球，加上充氣遊戲區、特色美食餐飲，以及DJ現場打碟，合組成這個一連兩日的沙灘嘉年華活動。
沙欖玩法好簡單，兩隊各有五人落場，上下半場各五分鐘，其餘玩法同一般欖球無異，亦分為男、女子組角逐，不過執法更加寬鬆，由於球手在沙地奔跑速度較慢，體力消耗更大，很易被對手捉到，仲會隨時食沙。
沙欖四式：運球
持球者為防止對方搶球，會趴喺沙上在隊友掩護下將球運走，等其他隊員組織攻勢。
傳球
持球者將皮球送交隊友，必須向後傳送，如果在奔跑中進行，更講求隊員之間默契。
攔截
同一般欖球一樣，雙方都要設法阻止對方前進，由於係沙地，攔截者更加去到盡。
達陣
欖球嘅最大目的係達陣得分，沙欖就更加要達陣，因為達陣後可以碌地沙。
圖／文：黃兆崑