去季憑紅框眼鏡Look爆紅的韋斯布克（Russell Westbrook），如今已成籃壇潮流的新Icon，這位雷霆控衞最近接受時裝雜誌訪問大談Fashion，過足料畀球員轉「型」一掃NBA「娘」風。前晚才出席美國心臟協會晚宴做善事的韋斯布克既有型又有善心，昨日即帶領雷霆主場以102比72大炒公牛，果真好心有好報！
「花喱綠」公仔恤衫襯窄身褲都夠膽着，韋斯布克衣着品味出名獨特，今季更「升呢」成為佐敦牌波鞋的代言人，證明潮流地位獲得肯定。這位型爆潮男最近為時裝雜誌《V》拍攝Cool爆硬照，更即席分享着衫心得，透露至愛TopMan、FarFetch及Urban Outfitters幾個潮牌之餘，又預言「短牛」及皮褸將成為春季大熱。
韋斯布克愈講愈起勁，仲揚言要肩負潮流重任，幫一眾NBA「行家」轉「型」：「NBA球員係公眾人物，着衫絕對唔可以求其，最重要係緊貼潮流同大膽配襯。身形太壯冇衫啱着？咪搵設計師度身訂造囉，唔少球員喺場外都着得好Hea、好娘，由今日開始真係要執執佢啦！」
除Fashion外，韋斯布克亦好熱心公益，前晚就出席美國心臟協會舉辦的年度盛宴，以大學好友巴斯（Khelcey Barrs III）因心肌症離世一事告誡大眾要注意心臟問題，又送出簽名波衫及波鞋拍賣，目標係要籌得64萬美元（約496萬港元）善款，用作資助心臟病研究項目。
韋斯布克好心有好報，昨仗就攻入全場最高的23分，成為雷霆以30分大炒公牛的贏波功臣，賽後雷霆更宣布以短約形式簽入前湖人控衞費沙（Derek Fisher）至季尾，期望這位38歲老將能協助球隊衝擊總冠軍。