沙比卓林普Chok爆尖東
嘩嘩嘩！兩大桌壇型男落「老尖」篤波！唔係講笑，臨時世界「一哥」卓林普同「二哥」沙比，前晚被本報獨家拍到神秘現身尖東青年桌球會，沙比更一時技癢，落場跟老友打番場友誼波，讓在場球迷大開眼界。兩位Nice到爆嘅球星仲化身「黃大仙」笑晒口為球迷簽名及合照留念，相當親切冧爆Fans！
兩位「80後」型男尋日到咗海口打世界公開賽，所以由英國經香港轉飛海口，前晚就逗留一晚順便同班Friend敍舊。原來「小丑」沙比同香港美式桌球前亞運代表李俊文（Bobby）私交甚篤，曾多次來港，上年就參加過表演賽。至於「花花公子」卓林普雖然從未喺香港公開露面，但之前亦兩次「路過」香江。
「小丑」碌新卡請食Pizza
卓林普同沙比分別到尖東同荃灣晚飯，據悉一身潮Look打扮嘅「小丑」剛申領到一張信用卡想試用，於是索性找數請食Pizza。飯後沙比率先殺落青年桌球會，仲即興同Bobby「拍跳」露兩手，卓林普返酒店梳洗後亦到波樓會合眾人閒聊「吹吓水」，但未有練波。在場球迷突然見到兩位世界頂尖球手出現都驚喜萬分，有女粉絲更得到二人簽名桌球，Happy到震！不過兩位巨星今次純屬私人性質到港，未有接受訪問。