長跑3子最後衝刺
星期日就係渣打馬拉松，相信大家都準備好嘞，呢集《萌星動起來》就係講跑步嘅，仲要一次過講晒全馬、半馬同10公里，三位藝人就係歌手吳浩康，BOY'Z嘅張致恒同關智斌，一人跑一個路程，周日如果喺路上見到佢哋任何一個，記得Say個Hi，或者嗌聲加油喇！
三位歌手其實都係渣打馬拉松常客，跑咗四、五年，其中Steven張致恒會挑戰極限，參加全程馬拉松賽事，佢話：「其實我以前都跑過全馬，對上嗰次已係幾年前，結果跑咗30幾公里去到西隧口就唔得要停低，今次再玩全馬我就做足準備，目標時間係4個鐘！」
阿Deep吳浩康將會參加半馬，佢一直有Keep住跑步，半馬當然難唔到佢：「我為今次比賽好勤力練習o架，幾乎一有時間就喺屋企附近幾個山頭跑上跑落，通常係瞓醒去開工之前，預留時間練跑步，收工後就唔會練，因為做完嘢成個人『謝』晒，練唔到o架。」
楊肇麟度身訂造三種熱身
Kenny關智斌就參加最短途嘅10公里，但由於路程短，佢對自己嘅要求亦比較高：「希望喺1小時內完成啦，我知道參加10K嘅市民人數最多，要造出好成績之餘，同時又可感受跑步盛事嘅熱鬧氣氛。」
為三位跑手擔任導師嘅長跑好手，就係前屆渣馬10公里亞軍楊肇麟，25歲嘅「阿楊」已投身社會工作，銷售專業跑步體育用品，為顧客度身訂造合適長跑裝備，佢今次就為三位歌手度身訂造，編排各自所屬路程嘅賽前熱身運動，希望幫佢哋造出好成績。三個路程，三種賽前熱身，總有一種最啱你。
長跑三項熱身大法
全馬拉松 拉筋：由於全馬路程最長，開賽前必須保持體力，所以賽前熱身運動亦唔使太激烈，拉拉筋、壓壓腿就得
半馬拉松 踢腿：半馬嘅賽前熱身動作要做足啲，令自己更快進入狀態，建議進行一連串大動作嘅踢腿，令腿筋拉鬆
10公里 衝刺：10K路程最短，想造出好成績，就要增加肌內嘅爆發力，賽前作變速跑衝刺，可令你衝刺更加有勁
圖／文：黃兆崑