占士韋迪化身芭蕾雙雄

熱火及芭蕾舞團同賀25周年

同於1988年成立的熱火及邁阿密芭蕾舞團，早於25年前已大玩Crossover，當時熱火名將比利湯臣（Billy Thompson）與一位芭蕾舞成員合作影宣傳相，引來一時佳話。雙方今年決定重現經典，芭蕾舞團派出姊妹花Jeanette及Patricia「恭候」熱火雙巨頭占士及韋迪，兩位芭蕾舞高手張張相都擺出超高難度「甫士」，反觀兩位「波牛」表情生硬，相映成趣。

「大帝」受訪時表示：「我諗我呢世都做唔到佢哋嘅動作！不過有時我同韋迪玩『拆你屋』，感覺都好似跳緊芭蕾舞咁正。」跳芭蕾舞「大帝」當然「唔曉」，但講到打波就冇得頂！占士昨日攻入全隊最高的30分，帶領熱火主場以13分之差砌低拓荒者錄創會第1,000W之餘，更成為NBA史上首位連續6仗獲得「30+」兼投射命中率超過6成的球員。

明晨客戰雷霆爆惡鬥

熱火愈戰愈勇連贏6場，明早造訪雷霆合演去季總決賽翻版戰必有惡鬥，主隊昨日突然跌Watt以94比109不敵爵士，「大帝」想力壓雷霆球星杜蘭特（Kevin Durant）做常規賽MVP，今戰就要打出身價，熱火受讓2.5分寧捧下盤。

（now 635周五早上9時直播）