票房仆直 魚腩族諗橋自救
【本報綜合報道】湖人、熱火同紐約人陣中粒粒皆星，主場出擊叫好又叫座，想買平飛真係冇可能！不過，一眾小城市球隊就因為波飛滯銷而「牙痛咁聲」，當中以東岸魚腩山貓最有諗頭，推出「選秀排名定票價」的噱頭吸客；公鹿亦推出超筍價「波飛加熱狗套餐」刺激入座率，期望主場不再冷清，熱熱鬧鬧過蛇年！
山貓玩選秀排名定價
經濟不景下，不少NBA球隊都面臨入座率低的問題，有球迷日前就透過購票網站StubHub狂掃18張76人波飛，以0.72美元（約5.5港元）就可以「霸晒成行」，反映球市慘況。「波神」米高佐敦（Michael Jordan）籃壇地位崇高，奈何旗下球隊山貓表現平平，更於東岸墊底，球隊宣傳部於是諗到條「選秀排名定票價」絕橋，務求殺出新血路。
球隊成績愈差就愈有機會獲得高順位選秀權，但實際選秀排位依然要經聯盟抽籤才可定奪。山貓於是以首個選秀排名作為波飛定價做噱頭，若球隊能獲得狀元籤，500位球迷來季便可以場均1美元購買山頂季票，榜眼2美元、探花3美元，如此類推。計劃推出後已收到逾2,000份參加表格，反應熱烈。
另一支東岸球隊公鹿有望殺入季後賽，但密爾沃基是小城市，今季入座率已跌至聯盟第4低，會方遂舉行「公鹿之夜」大酬賓，14歲以下小童波飛及場內熱狗均以1美元超筍價發售，希望球迷帶埋一家大細入場，擺明搶家庭客。
活塞劈價送飛都唔掂
但咪以為劈價就一定掂？活塞即使出動「買季票得球會名宿陪打Golf」甚至免費派飛，奧本山皇宮球場依舊大把「吉位」，位於麻薩諸塞州的史密夫大學經濟學家森巴列斯上周就主動袋錢落活塞袋：「派飛會嚴重打擊價格結構，試諗吓隔籬位球迷係免費飛入場，你就用正價買飛，嬲唔嬲先？球迷唔入場因為上網睇到波，球會應該畀番啲喺屋企感受唔到嘅嘢回饋入場球迷，例如送Tee、抽獎、泊車優惠，咁仲實際啦！」