近排香港球圈真係多多事幹，最轟動當然係曼聯今夏訪港嘅賣飛安排，仲有史上首次「公投」票選嘅港聯開操，同埋港隊爆大冷作客摸和烏茲別克，再數落去，其實仲有一件頗為特別嘅事，就係波總紀律小組總辭。大家試諗吓，「日本內閣總辭」就聽得多，香港球圈竟然有人搞「總辭」，令呢班辭職人士嘅地位忽然提升至「日本內閣」級別，認真唔講得笑！
紀律小組其實即係「球壇法庭」，主要功能就係判案，即係某球員領紅牌，球庭就根據球例判佢停賽若干場，至於邊啲人負責紀律小組工作，喺舊波總年代，多數由執委同球圈人士兼任，自從波總改由董事局打骰後，就搵班獨立人士打理球庭，當中有幾個仲係律師添！
今次發生「總辭」事件，係由辭職嗰班人主動向傳媒爆料而揭發，其實以事件性質本身嚟睇，都應該幾震撼，一諗起日本內閣總辭個畫面，成班西裝友一字排開九十度鞠躬，然後劈炮唔撈，幾有型呀！但可惜呢勻佢哋棋差一着，就係爆料揀錯時辰，Timming完全錯晒，事關粉絲們近期忙於跟進曼聯波飛消息、睇港聯同為港隊鼓掌，波總球庭邊個做邊個走咗，球迷又邊會關心吖！