一直有傳波神米高佐敦（Michael Jordan）今年會第2次做老襯，昨日美媒《TerezOwens》爆料，話佢已經落實喺美國時間今年4月27日同古巴籍女友伊維狄（Yvette Prieto）拉埋天窗，佢兩個近期密鑼緊鼓籌備緊婚禮事宜，消息指呢場婚禮將會喺南佛羅里達州舉行。本月17號就會慶祝50大壽嘅MJ，依家每逢出席大小場合都必定帶埋伊維狄，拍拖3年一直鬼咁恩愛，呢位山貓班主早排使咗超過2,000萬美元翻新位於南灘嘅豪宅，呢個新愛巢咁揼本，肯定冧爆伊維狄。