體藝女足重奪校際冠軍
楓哥好嘢！全靠傑志甲組腳「楓哥」顏樂楓漏夜向失眠隊員發WhatsApp鼓勵，賽馬會體藝中學昨在北區運動場上演嘅全港中學校際女子足球賽決賽，憑陳曉彤及鄭凱瑩下半場各建一功，以2比0戰勝衞冕嘅獅子會中學，重奪后冠。頭場聖芳濟各書院以1比0擊敗基督教香港信義會信義中學，獲得季軍。
2:0破獅子會衞冕夢
體藝對獅子會賽前被視為「五五波」，勝負取決於臨場發揮，獅子會着重防守，一度令進攻型嘅體藝「老鼠拉龜」，半場互無紀錄，體藝沉着應戰，終在下半場先由陳曉彤打開紀錄，其後再憑鄭凱瑩一腳「世紀笠射」成2比0，末段獅子會全力反撲，其中一次攻勢可惜射中柱，最終體藝淨勝兩球捧盃而回。
體藝奪冠後將教練姚安娣拋上半空，隊員又大力搖勻汽水向她噴射，興奮心情久久未能平復，姚安娣笑謂要給隊員200分：「我哋優勝之處係夠積極，成場波發揮得好好，值200分！」隊員賀允同當選ＭＶＰ，由名宿兼香港女足隊教練陳淑芝手上接過獎座。
講笑話為師妹減壓
最近由飛馬重返傑志體藝男足主力顏樂楓亦有到場為女足打氣，原來今次體藝奪冠，佢都出咗唔少力，佢話：「賽前好多隊員都緊張到瞓唔着，凌晨1點幾仲同我WhatsApp，我就鼓勵佢哋，同佢哋講笑話放鬆減壓，見佢哋今場波踢得咁定當，仲捧埋盃，我都好感動。」
圖╱文：黃兆崑