紐約人球星史杜迪米亞（A米）向來有情有義，繼早前請一班小朋友免費睇波後，昨日又大搞親民活動，豪請球隊主場麥迪遜廣場公園嘅職員食飯；同樣愛心爆棚的還有熱火老將柏堤亞，佢續以歌會友舉行慈善「K聚」，為一班小童籌措學費。
「A米」昨日透過旗下嘅基金會，宴請大約六百位麥迪遜廣場公園的職員食自助餐，期間更亮相「食埋一份」，又與一眾員工家屬簽名和合照，全程有求必應Nice到爆！呢位紐約人大前鋒表示：「如果唔係呢班員工一直盡心盡力工作，我哋呢班球員又點會有一個咁舒適嘅更衣室同球場先？呢餐飯就當係報答佢哋，我承諾以後每年都會搞呢個聚餐。」
講到做善事，熱火小前鋒柏堤亞亦「唔執輸」，這位「K神」每年都會舉辦「慈善K王大賽」，為貧困小童籌措學費及提供獎學金。一眾熱火隊友當然唔會「托手（月爭）」，包括勒邦占士、韋迪、保殊甚至新加盟嘅「鳥人」基斯安達臣都有出席這項慈善活動，仲齊齊粉墨登場上台高歌，就連五音不全嘅球會總經理萊利亦獻醜「唱埋一份」，認真畀面柏堤亞！
熱火眾星為慈善不遺餘力肯定有好報，明早主場出擊恭候弱旅速龍當然可以秤先，讓8.5分捧上盤。
（周四早上8時30分開賽）