【本報綜合報道】唔好以為高中聯賽受歡迎，淨係喺《足球小將》先見到，日前第91屆日本全國高中足球聯賽決賽，靠募捐前進嘅神奇球隊鵬翔高中，喺落後兩球劣勢下扳平，最終憑互射12碼爆冷以5比3擊敗京都橘隊。呢場雖然係高中聯賽賽事，竟吸引到逾5萬人入場支持，認真犀利。相比起勝利嘅喜悅，其勵志嘅奮鬥過程，更令人動容。
原本鵬翔知名度極低，甚至係48支球隊中最窮嘅一隊，準決賽對住星稜高中，鵬翔幾位球員喺隊友主射罰球時，跪喺對方人牆前擋住門將視線，並且成功取得士哥，呢招新嘅罰球戰術一出，喺網絡上紅爆出晒位，令該隊一戰成名。
不過，鵬翔未有因此得到更多資助，原定14號舉行嘅決賽，因一場大雪被迫延期，當時該隊嘅盤川已經用晒咁滯，一班粉絲惟有喺網上發起募捐運動，為愛隊籌錢，曾於鵬翔發迹的鹿島鹿角球興梠慎三亦給予支援，最終能撐到決賽大戰，因此鵬翔爆冷贏得全國冠軍，更似一套激動人心嘅勵志片。