伊雲斯守出新血路

伊雲斯喺場上最令球迷讚嘆嘅係其打不死嘅精神，今季籃網陣中可謂粒粒皆星，然而最欠星味嘅伊雲斯卻成為Fans至愛，點解會出現咁嘅情況呢？原因好簡單，就係因為伊雲斯打得夠搏！呢名三十二歲大前鋒今季喺平均每場約二十分鐘嘅上陣時間，竟能搶到8.1個籃板球，在場時球隊每場平均領先對手高達二十分，堪稱為籃網陣中嘅效率王。

老竇入獄 選秀會冇人吼

據伊雲斯嘅舊隊友白蘭巴利透露，「The Thing」即使喺練波期間都係搏盡老命，每次搶籃板球都好似打保齡球一樣將一眾隊友掃低，點解練波都要搏得咁盡呢？伊雲斯於訪問時自爆係受到成長環境所影響：「我爸爸同表哥都因為販毒而入獄，籃球可說是我童年時代嘅一切。2002年我雄心壯志去參加ＮＢＡ選秀會，但最終竟然係冇球會要我，結果當眾喊到豬頭咁款。我相信就係因為呢啲經歷令我依家變得咁堅強，同時要把握每一個機會去搏命。」

恩師點醒化身籃板王

球迷睇數據第一眼必定先看球員得分，不過伊雲斯就有另一番見解，並坦言決心成為「籃板球達人」全因被恩師「點醒」：「當年係超音速執我返嚟，麥美倫（前拓荒者教練）就係我嘅恩師，佢職業生涯平均每場未曾攞多過7.6分，但佢件波衫就已經被超音速榮休，證明畀心機做好防守，唔單止可以幫到球隊，仲可以得到球迷尊重。」伊雲斯真係愈老愈紅，近期經常正選上陣，以連串好表現來回饋球隊，日前對76人一仗竟然狂摘23個籃板球，創下個人職業生涯新高，伊雲斯已成為籃網於東岸爭取好成績不可或缺嘅棋子。

經典大器晚成：賓華萊士

96年出道嘅大賓一向無甚耀眼表現，直至2000年轉投活塞，其硬淨打法令佢成名，係少數能夠頂得住「巨無霸」奧尼爾嘅球員，當佢協助活塞贏得總冠軍時，已經係30歲。

陶告魯

呢名小前鋒係NBA首名土耳其球員，經歷過帝王及馬刺四年磨練，04年去到魔術，於09年30歲帶領球隊自95年來再度贏得東岸冠軍。

比立斯

成為97年新秀探花嘅比立斯，經過多個球季効力塞爾特人、速龍、金塊同木狼後冇人要，於02年被活塞執走，結果04年助活塞擊敗湖人贏得總冠軍。

伊雲斯 Profile

出生日期：18/05/1980(32歲)

身高：2米03

體重：245磅

曾効力球隊：

超音速、金塊、76人、速龍、快艇及籃網

撰文：譚詠謙