縮水甜瓜愁爆新鞋會
【本報綜合報道】安東尼早前與加納特衝突餘波未了，被揭發婚變嘅「甜瓜」，竟得唔到紐約人行政總裁杜蘭支持，後者仲靜靜雞派出兩位麥迪遜廣場公園職員監聽呢位紐約人球星，上演「ＮＢＡ版竊聽風雲」！被當正癲佬嘅安東尼逼到失常，自爆節食咗半個月，日前出席新鞋發布會更加神情呆滯，成個人落晒形，令粉絲心痛！
據《Star-Ledger》尋日爆料，上星期紐約人主場輸畀公牛場波，杜蘭分別放咗「兩條針」坐喺紐約人後備席附近同角落頭位，二人都攞住一部高科技遮形收音器，全場錄低安東尼講過乜嘢，然後報告畀杜蘭，再研究安東尼是否情緒失常！由於部監聽儀器「擺得太揚」，結果連傳媒都發現到，唔少網民都不滿杜蘭，炮轟呢位ＣＥＯ影響球會形象，同時對安東尼深表同情。
同LaLa婚姻有轉機
「甜瓜」則自爆以「精神原因」為由，節食咗半個月，雖然營養師勸告要注意飲食，但「甜瓜」任何肉類都唔想食，難怪本周一對黃蜂打到腳仔軟，全場25次起手炒咗16球。早前為新鞋「Jordan Melo M9」舉行發布會，安東尼當晚傻吓傻吓，塊面仲瘦咗唔少。不過據佢老婆LaLa嘅密友所講，LaLa根本冇話過要離婚，分居只係想冷靜一下，希望「甜瓜」收到呢個消息會盡快振作啦！