熱火孖寶探望為腦癌球迷圓夢
「熱火孖寶」勒邦占士與韋迪不止是籃球巨星，同樣是孩子們的榜樣，會用自己的愛心傳遞正能量。早前，一位身患絕症的熱火「死忠」球迷希望能與占士見面，「大帝」得知後積極回應，更與韋迪一同實現這位球迷的心願，兩位巨星獻愛心行動大獲媒體讚賞。
看到留言即時回應
據美媒《beyondthebuzzer》報道，一位叫Nicole Peterson的女球迷早前在占士facebook發出請求，希望「大帝」能與其患腦癌時日無多的朋友Joey Anderson會面：「勒邦占士先生，唔知你會否睇到留言，我最好嘅朋友Joey Anderson正與腦癌搏鬥，恐怕時日無多。佢想喺離開前實現一個願望，就係現場睇你哋打波，佢係你哋忠實球迷。周六係佢23歲生日，佢會同媽媽入場睇對拓荒者嘅賽事，唔知你可否同佢見面，等佢夢想成真。」
占士看到留言後作出回應，在對拓荒者賽後實現Joey Anderson的心願，為這位堅強的熱火球迷簽名和合照，更帶來一個驚喜，就係邀請好友韋迪一同獻愛心，眾人度過一個溫馨的晚上。「熱火孖寶」的善舉令現場記者和球迷非常感動，美媒亦大讚兩位巨星，更指他們的積極影響已超越籃球，鼓舞大家勇敢面對生活中的艱難。
其實，這並非占士與韋迪首次幫助患病球迷圓夢，上季兩人就與一位患癌症的高中籃球員共度周末，更以簽名球衣、籃球鞋和相片作禮物。
好心有好報，「熱火孖寶」昨晨打完三節已可提早休息，而球隊藉後衞查馬斯破紀錄喪入10個3分球貢獻34分，作客帝王大勝128比99，成功終止兩連敗。熱火明早作客對爵士，氣勢如虹下讓6.5分捧上盤。（now 678周二早上10時直播）