兩代得分王各領風騷

雲妮莎難忍高比風流成性，於2011年尾提出離婚，本周更將當年由「小飛俠」贈送的一棟紐波特港豪宅以322萬美元（約2,589萬港元）出售，二人看似緣分已盡，偏偏就有個意想不到的Happy Ending！繼高比前日於facebook上載兩人錫錫相晒恩愛後，雲妮莎昨日透過instagram發表復合聲明：「我哋好高興咁宣布，離婚訴訟已經撤銷，大家都期待着美好嘅將來！」

杜蘭特上網溝女食檸檬

「小飛俠」成功挽救婚姻，反觀被視為「毒男」的杜蘭特就依然一支公！據《TMZ》爆料，這位三屆得分王日前與一位女球迷玩Skype，更一反常態攤喺床擺Chok樣冧女，奈何整個過程遭女方Cap圖掟上網，KD今次都算瘀爆咯！

不過，情場失意的杜蘭特返回球場就大開殺戒，昨日與韋斯布克合力攻入69分，帶領雷霆作客以15分之差大勝「紫金兵團」。

湖人6連敗 積尼高遜冇癮

湖人持續不振，自07年3月以來首次連輸六場，就連兩位「死忠」擁躉積尼高遜及阿當桑迪拿都冇眼睇，在第四節初段已提早離場。湖人名宿「魔術手」莊遜則在電視直播評述時感嘆：「我嘅湖人完啦，湖人入唔到季後賽，乜嘢都冇啦！」至於氹掂老婆復合的「小飛俠」如今可全心全意打波，當然要盡快率領湖人重回勝軌，明早主場讓騎士6.5分，一於捧上盤。（周一上午10時30分開賽）