聖誕節冇波打嘅艾榮，原來去咗溝女度佳節。昨晨一張艾榮攬女相喺互聯網瘋傳，從照片所見，呢位2011年狀元飽食「波餅」，最離奇係呢張相竟然係由艾榮個twitter發布。
據美媒《Inflexwetrust》爆料，相中黑衫索女係呢單嘢嘅幕後黑手，就係佢當晚搶咗艾榮部手機靜靜雞「鋪相」。艾榮知道瀨嘢極速剷相，又喺一個鐘頭內狂發留言「耍冧」，仲稱呼女友Natalia係老婆，擺明身有屎喎！「張相唔係我『鋪』，對唔住咁多位fans……我點會上載啲咁嘅相？我有老婆o架，真係黐線！」身處家鄉巴西嘅Natalia好快就透過twitter回應，話「有人想搞事博出位」，睇嚟艾榮已氹番正印咯。