籃網打吡戰輸波輸品

籃網前鋒堪富利斯同巨乳名媛Kim Kardashian單離婚案拖咗成年，最近又有突破性進展，呢位NBA「大茄」竟然衰格到問阿Kim攞番隻200萬美元（約1,550萬港元）結婚鑽戒，原來要嚟貼錢畀新歡去隆胸。有呢位賤男在陣，布魯克林籃網都唔多老利，尋日場紐約打吡戰，以86比100被紐約人大炒，可謂輸波又輸品。
安東尼快攻上籃，攞分冇難度。（美聯社圖片）
安東尼快攻上籃，攞分冇難度。（美聯社圖片）

一個係籃壇大茄，一個係著名集郵女，外界一直唔睇好堪富利斯同阿Kim段戀情，估唔到呢段婚姻只係維持咗72日就宣布玩完，堪稱係娛樂界頭號笑料。堪富利斯咁快畀人飛條氣梗唔順啦，最近佢就搵律師指控舊愛，話上年8月場婚禮係阿Kim親自策劃嘅一場騷，呢段婚姻根本唔成立，所以想攞番隻價值200萬美元嘅20.5卡鑽戒，呢單嘢睇嚟又有排審。

雷霆及快艇（白衫）昨日擊敗鷹隊及黃蜂，分別累積十二及十一連勝。（美聯社圖片）
  • 雷霆及快艇（白衫）昨日擊敗鷹隊及黃蜂，分別累積十二及十一連勝。（美聯社圖片）

貼錢畀新歡隆胸

據美國傳媒爆料，堪富利斯係都要咬住隻鑽戒唔放，皆因佢最近貼埋錢畀新歡Myla Sinanaj做隆胸手術，所以要搵番啲油水幫補吓，至於新女Myla Sinanaj嘅上圍一下子由B Cup「升呢」變D Cup之後，着埋比堅尼個Look十足十「老翻阿Kim」咁款，美媒仲稱呼Myla做「Kardashian2.0」，證明堪富利斯仲對舊愛念念不忘喎！

安東尼復出紐約人大勝

堪富利斯衰到貼地，就連累球隊籃網喺紐約打吡都輸埋，以86比100輸畀紐約人，遭遇三連敗。至於紐約人有安東尼復出，狀態唔錯，三分球8投4中，共取31分3個籃板，周六將主場迎戰公牛，力爭連勝。另一邊廂，西岸兩大勁旅雷霆及快艇，昨日分別擊敗鷹隊及黃蜂後，累積至12及11連勝，弗爆聯盟。

本報綜合報道