英華Sell團結爭精英籃王
學界「籃」主角這個聖誕假不太「懶」，只因全港學界精英籃球賽今日起，連續五日爆發，男、女子組各有24隊來自港九新界的中學籃球勁旅出賽，為爭冠軍作為「最佳聖誕禮物」必定各師各法，其中男子組大熱門英華書院坦言「團結」是他們的最強武器！
每年男子組都鬥得相當激烈，去年失落精英賽冠軍的「九龍籃王」英華書院，今年誓要捲土重來。英華早前在九龍區D1賽以全勝姿態奪冠，為校隊打下強心針，根據精英賽抽籤形勢，英華有機會在8強賽火併遵理學校，英華入樽王吳俊欣透露，希望以「團結」來克敵：「今年我們的目標當然係重奪冠軍啦！對手包括遵理，我哋都有信心，卻唔敢話穩操勝券，畢竟對方每個球員都有番咁上下個人技術，尤其梁兆華，佢曾經係2012 Nike League得分王，實力不容小覷。我哋比對方優勝嘅或許就係『團結』，因為佢哋係第一次夾，默契方面或者冇我哋咁好。」
喇沙今揭幕日撼毅智
吳俊欣更希望能夠運用自己1.97米的身高優勢，打好防守：「其實喺最近嘅訓練，教練都加強咗體能、全場緊迫、防守方面嘅鍛煉。我期望可以改善自己無謂嘅犯規次數同多利用身高蓋對手『火鍋』，阻止對手得分，力取我第一個精英賽冠軍。」至於去年精英賽冠軍喇沙書院先在首天賽事與賽馬會毅智書院對決，成為揭幕日的重頭戲。