呃錢狀元或投湖人
速龍球星巴格蘭尼於NBA轉會窗重開日成為主角，其効力的東岸弱旅速龍新球季輸到懵，這位「呃錢狀元」為博轉會突然犯眾憎，昨晨向祖家意大利傳媒數臭球會，怒插速龍乃「史上最廢」。巴格蘭尼出位言論辣慶速龍高層及球迷後肯定「冇得留低」，盛傳湖人已準備接手，與速龍炮製轉會窗重開後首宗重大交易！
速龍開季廿三戰只贏四場，表現大跌Watt的巴格蘭尼成為眾矢之的，這位06年意大利籍NBA選秀狀元目前因右手手(月爭)韌帶撕裂料休戰三周，他昨晨接受意大利《La Gazzetta》電話專訪時更喪鬧球會：「其實我閒閒哋可以一場攞50分，但係球隊贏唔到波講乜都冇用，速龍絕對係聯盟史上最廢嘅球隊，如果有得轉會我一定走，不過呢樣嘢唔到我話事。」
同湖人換加素機會高
NBA轉會窗今日重開，騎士中鋒華拿祖、爵士前鋒米沙比及木狼二年生戴歷威廉士都屬於熱門交易人物，但就以巴格蘭尼最有機會轉會他投。據悉，速龍高層已經召開緊急會議，計劃將巴格蘭尼及控衞加特朗一齊送走，由於戰績同樣低迷的湖人亦有意放走西班牙球星加素，加上速龍一向心儀非本土球員，故雙方隨時一拍即合。
速龍決心同巴格蘭尼斬纜，昨日即時反彈，以95比74大炒到訪的小牛，周一凌晨主場對火箭有力乘勇搶W，受讓3.5分要下盤。
至於另一盛傳被交易的主角加素，則有望於明早傷愈復出，奈何湖人近況低迷，作客撼表現硬淨的76人難睇好，76人讓5.5分寧捧上盤。
本報綜合報道