韋特未出場就等摺埋

韋特（Royce White）今年1月接受《ESPN》訪問自爆患有飛行恐懼症，之後就無故缺席球隊媒體日及首天訓練營，其後又要求火箭為他安排大巴出席球隊客場賽事。縱然火箭對他無微不至，但韋特依然炮轟會方「講一套做一套」，斥責球會未有盡全力幫助他克服焦慮症。

玩失蹤反咬球隊唔錫佢

美國著名記者Adrian早前撰文批評韋特：「職業體育係非常殘酷，韋特根本唔值得火箭浪費第16順位嘅選秀權同關懷，最重要係韋特將自己塑造成一位受害者，如果佢有咁多怨言，不如結束ＮＢＡ生涯。」

麥帥喪女 火箭無人領軍

睇到Adrian撰文批評自己，眼火爆的韋特昨晨情緒失控，透過twitter一口氣轉發過百條fans的留言支持訊息，並向Adrian開火還擊：「仲話自己係一位新聞工作者，Adrian報道嘅根本唔係事實，一啲根據都冇，我會一路(目及)實你嘅報道。」韋特今季仍未為火箭披甲，加上情緒有問題，有消息指會方已準備將他下放到發展聯盟的球隊。

韋特情緒問題仍未解決之際，火箭再傳來壞消息，主帥麥希爾的愛女Sasha昨晨因病逝世，年僅廿三歲，預料麥帥未來幾仗都不能領軍。不過，火箭主力林書豪就表示會努力打好波令麥希爾放心，球隊明早於主場恭候速龍，讓4.5分撐上盤。

（now 678周三早上9時直播）