紐約人喺暑假未有高薪留低林書豪，畀球迷鬧到狗血淋頭。球隊其後幾宗交易，包括換入三個舊將「勉族人」甘比、「小鋼炮」費頓、「老油條」卻特湯馬士，簽入「神奇叔叔」傑特，又成功游說「技犯王」拉舒華萊士出山。由於全部都係年紀有番咁上下嘅熟男，所以冇人會寄望紐約人起飛。
在史杜迪米亞（A米）受傷嘅情況下，紐約人被迫將安東尼放上4號位，由於傳統大前鋒比佢高嘅都唔夠佢快，比佢矮嘅又唔夠佢咁大隻，所以非常「屈機」，令「甜瓜」反而展示出MVP水準，首六場比賽射入23.8分同搶到8.1個籃板球。
只計單打技術，安東尼絕對唔比高比拜仁差，最重要係「甜瓜」今季比賽心態似乎有所轉變，願意將球權分畀隊友。就以前仗對馬刺為例，安東尼因為手風唔順，不斷為隊友製造機會，同以前將自己利益凌駕於團隊嘅打法變得唔同晒。
美國隊近幾年欠缺有牽制力嘅中鋒坐鎮，令球隊要主打快攻，利用切入及更多擋拆為球員創造輕鬆嘅出手機會。令外線同籃底都通殺嘅「甜瓜」每場能輕易攻入20至30分，表現重好過打NBA。記得安東尼上季擔任大前鋒時，命中率曾高達50.5%，平均得分更高達30分！
不過，紐約人能唔能夠將勇態帶到季中甚至季後賽，有兩大不安因素要處理。首先係A米兩個月後康復歸隊，他與安東尼同時擔任正選時，會唔會好似上季咁發揮唔到「1＋1＞2」嘅效果呢？以依家紐約人將團隊戰力發揮至最高點嘅時候，硬要將A米放回正選陣容，實在係不智行為，但將一個2千萬美元年薪嘅球星放喺後備席，又真係有啲大材小用。
另一個要擔心嘅係紐約一半隊員年齡都係30歲以上，而且都比較容易受傷，萬一傷兵增加時，球隊戰績自然受到一定影響。
最後筆者要讚一下JR史密夫，上季曾經認為佢係球隊毒瘤，但今季佢戒咗夜生活，一心一意為球隊爭取佳績，絕對係抵錫！