世界各地嘅職業隊制運動都有一個習慣，每當球隊交唔出預期成績，教練都成為孭鑊者。莫論足球、籃球或者棒球隊，總之老闆覺得唔妥當就會出手，開刀可謂快又準，唔會畀情況惡化落去。
香港對於炒教練較為猶疑，老闆覺得既然同教練有合約關係，突然炒魷就要向對方支付賠償金，考慮到經濟原則，好多時教練冇料都會捱到合約完結先至會離隊。當然，唔同人對於炒教練都有唔同睇法，但Peter覺得老闆如果唔肯大刀闊斧，成日拖拖拉拉的話就會錯失最佳「診治時間」，對於球隊嚟講絕對冇好處。
NBA球隊湖人了解到現實情況，尋日終於同教練米克布朗解除合約。而米克布朗一走咗，湖人又即刻贏波，真係唔到你唔信。老實講，當年米克布朗執教騎士之時，既有「大帝」勒邦占士之助亦贏唔到總冠軍，你就知佢能力有限。依家去到粒粒皆星嘅湖人，一樣發揮唔到球隊應有威力，湖人同佢分手都好正路。查實要球隊打得好，不如再搵返積遜教練啦，係「禪師」先至可以駕馭到湖人班球星。但要請佢都唔都唔係咁容易，除要考慮積遜教練本身取向之外，昂貴薪酬都係阻力。
金句：A coach is hired to be fired（聘請教練是用來解僱）
黃興桂