籃網吉祥物樣衰捱轟

新季搬遷到紐約布魯克林嘅籃網真係動作多多，除饒舌歌手小股東Jay-Z早前落手落腳設計新波衫及周邊商品外，會方更找來驚奇漫畫（Marvel Comics）合作設計新吉祥物，成為首支以英雄人物擔任吉祥物嘅NBA球隊。

之不過呢位手執盾牌兼身穿盔甲嘅「布魯克林騎士」似乎唔多討好，有球迷以「核凸」及「未完成的手工製品」來形容呢位籃網「生力軍」，更有fans自爆於籃網主場巴克萊中心目睹呢隻吉祥物後嚇到失眠，認真陰功。

英文名似AV女優

更大鑊係「布魯克林騎士（Brooklyn Knight）」以及以「布魯克林之夜（Brookly Night）」作藝名的當地著名AV女優僅差兩隻英文字母，上網搜尋時打漏隻字隨時搵到Brookly Night嘅「作品」，一眾NBA小球迷如果上網search錯，後果肯定不堪設想！

同樣大把搞作嘅小牛老闆古班，近年多次操縱球會市場部團隊以滿足一己私欲，最近又試擺班手足上枱，將陣中球員Key落Psy肥叔身上打造《小牛Style》，而自己亦粉墨登場玩埋一份。只係可憐魯域斯基、美奧及卡達等NBA球星慘成小丑，「被迫」跳騎馬舞。

本報綜合報道