珊珊湊女辛苦過玩帆
「風之后」李麗珊，一個家喻戶曉的香港體壇人物，贏過無數大大小小的比賽，曾三次踏上世界賽最高台階，96年奧運更為香港奪得歷史性首面金牌，叱咤體壇，已退役8年做全職媽媽，她形容比做運動員辛苦100萬倍，為了培育兩位「小公主」，不斷Upgrade自己拒做師奶，原本五音不全的她甘願去學睇「豆豉」，與囡囡一起學彈琴、拉Violin，不過，她坦言每天與時間競賽，仍不斷尋找教女良方，更形容這場競逐自己肯定不會是贏家！
記：記者 珊：李麗珊
記：珊珊，好耐冇見，兩個女幾大喇？讀緊幾年級？
珊：大女希皚7歲，今年小二，細妹嘉怡5歲，都K3喇，出年升小學，又要煩餐飽。
記：你同老公阿Sam（黃德森）喺教女方面嘅角色點樣分配？
珊：我兩公婆湊女一人一瓣，我係「教育組」，佢係「娛樂組」；「娛樂組」想用好多時間去娛樂，但「教育組」話佢聽，要向現實低頭。細女還可以，大女真係唔得，點都要讀書為先。
記：好典型嘅「嚴媽慈父」喎！
珊：都可以咁講。阿Sam EQ高，形象夠Nice，但惡起嚟好得人驚、冇情講；佢最擔心我谷壞，所以見到我嗌晒救命鬧女，啲女都唔聽話，就會好嬲；其實兩個女驚阿爸多過驚我，阿媽幾嬲幾惡，最後都係錫番你、攬番你，冇計！
因應學習生活不斷變
記：湊女生活令你最大改變係乜？
珊：不斷Upgrade自己，因應個女需要而改變。好似買電話同電腦，以前好Personal，依家出發點係為個女，想買部可以做網上功課嘅電腦，一定Search足夠資料，咩機種、行咩嘢（OS）全部要識，更重要係計埋買得值唔值，依家始終係個家庭主婦，要照顧頭家，唔可以好似以前做孤兒寡女嗰陣，（啲錢）用晒咪算囉！就算買個Printer我都唔會求其，久而久之，喺呢個過程入面我學到好多知識，唔會同社會脫節，如果唔係就變師奶，齋講電視有咩節目，呢啲唔係我想要嘅人生。
記：除咗科技資訊，仲為個女學咗咩嘢？
珊：對我嚟講比較新挑戰係小提琴，我未至於拉埋一份，但學識咗睇「豆豉」（樂譜），平日陪個女去上親子班，學埋一份，起碼都知佢有冇拉錯。我以前有冇興趣？咪玩啦！依家唔同晒喇，當一種娛樂，OK嘅！另外仲會同佢一齊去學中文、英文、朗誦、羽毛球……其實我做嘅一切，既可以學嘢、親子，又得到兩個女信任，賺晒！
教女嘗盡酸甜苦辣
記：湊女咁多年，最難忘嘅事係乜嘢，有冇試過激到喊？
珊：試過，最難忘、最痛心係打佢，有次大女又唔記得帶功課，我嬲到爆炸……一個禮拜冇帶幾次，真係火滾，打囉，雖然唔捨得用藤條打，但用手打都打得幾甘，打完之後個心痛到呢，個心好唔舒服，嗰晚勁唔開心，但阿女仲要我陪佢瞓覺，以為佢瞓着，我就攬住佢喊，點知畀佢聽到，結果兩母女一齊喊。其實打女試過好多次，但呢次最狠、最難忘、最痛苦。其實，我要求老師嚴格，我唔怕佢哋鬧或者罰個女，始終都係想小朋友好啫。
記：咁有喊必定有笑，最窩心又係邊次，同大家分享吓！
珊：第一次收到阿女寫信畀我囉！好多小朋友都會畫畫送畀阿媽，佢哋都有試過，但細女啱啱上K3嘅時候，就用英文寫咗封信畀我，當然文法、串字有啲甩漏，但個心真係好Sweet。
記：作為「嚴媽」，現階段係咪乜都你話事？去到幾時先會「放手」？
珊：我都好想母女可以好似朋友咁傾偈，但依家仲唔得住，小朋友仲細，係一張白紙，你要幫佢劃嘢，Set好一個模範，講真，個女讀到中一已經唔受你控制啦！
做阿媽永遠冇得贏
記：有冇發現兩個女有做運動員天分？
珊：家姐性格唔似係運動員，反而阿妹有機會，佢係好要強嘅人（似足我），好似去朗誦咁，講完就走嚟問我幾時去攞獎，自信到爆！
記：做阿媽係咪難過做運動員？
珊：難100萬倍！同埋你永遠冇得贏，運動員會知道要點樣就有機會（贏），但做阿媽永遠贏唔到，因為呢種係親情，就算仔女幾差，始終係自己骨肉，點都唔會衰到劈炮唔理佢。做運動員可以退賽，做阿媽就唔得，仲要成世冇得抖……養兒一百歲，長憂九十九！
珊珊一天時間表
6:20am 起床
7:15am 送大女返學
8:15am 送細女返學
9:00am 返屋企
9:00am-1:30pm 私人時間
2:00pm 接細女放學
2:30pm 教細女做功課及溫書
3:30pm 接大女放學
4:00pm 教大女做功課及溫書，或帶囡囡參加活動
7:30pm 晚飯
8:30pm- 囡囡輕鬆時間
10:00pm （講故事或睇電視）
10:00pm 女兒睡覺
11:00pm 珊珊睡覺
大女：希皚
年齡：7歲
就讀學校：聖保羅男女中學附屬小學
嗜好：畫畫、芭蕾舞、中提琴、游泳
細女：嘉怡
年齡：5歲
就讀學校：銅鑼灣維多利亞幼稚園
嗜好：小提琴、游泳、羽毛球、LEGO、畫畫、芭蕾舞
圖／文：李芷韻、Maggie