一般人蒲完通宵，第二朝返工都會冇厘精神影響工作，但呢個情況就唔多適用喺火箭嘅占士夏登同熱火嘅「雷神」雷阿倫身上，因為佢哋兩個可以話係愈蒲愈精神，占士夏登同脫衣舞孃開心完大派銀紙，其實場上表現依然勇猛，仲榮膺上周西岸最佳球員；雷阿倫蒲完夜店後昨晨出戰太陽，貢獻15分令其職業生涯總得分達到23,003分跨越里程碑，喺現役球員中排第四。兩個蒲精愈蒲愈醒，真係唔到你唔服！
美國八卦媒體《Terezowens》爆料，雖然被交易到火箭約一星期，不過占士夏登已對休斯敦夜店非常熟路，迅速成為脫衣舞夜店嘅貴賓。近日，夏登光顧一家脫衣舞夜店時出手闊綽，就連脫衣舞孃都喺twitter留言多謝佢。一個叫Jasmine Taylor嘅脫衣舞孃就喺twitter寫道：「漫長嘅一晚，不過感覺好正，多謝占士夏登。」佢同時上傳一張有幾綑銀紙嘅相片，相信係小費，大約有數千美元，可見剛簽下肥約嘅夏登出手非常闊綽。
該媒體得知占士夏登流連脫衣舞夜店亦不忘「抽水」：「咪睇占士夏登初嚟埗到，簽咗肥約嘅佢唔只球場上爆發，場外亦表現強勢。」曾經有人擔心夏登呢位「夜店達人」成日夜蒲會影響比賽狀態，但呢種夜生活似乎冇消耗佢嘅體能，仲令佢能量更充沛，難怪佢能夠當選上周西岸最佳球員，睇嚟佢真係愈蒲愈弗嗰種球員。火箭明早將於主場迎戰金塊，讓3.5分捧上盤。
（now 635周四早上9時直播）
至於雷阿倫蒲夜店就純粹慶祝贏波，因為之前熱火對金塊佢射入「3+1」絕殺令球隊反勝，賽後梗係同隊友去夜店放鬆吓。「風度翩翩」嘅雷阿倫喺夜店大受歡迎，女球迷爭相同佢合照。蒲完夜店嘅雷阿倫尋日面對鳳凰城太陽攻入15分，成為現役球員第四位職業生涯總得分超過23,000分嘅球員，助熱火以124比99輕取對手，顯示佢狀態非常好，完全冇夜蒲後遺症。