嚴媽打造余翠怡
「佢叫我唔好咁傷心，依家冇咗隻腳啫，又或者我係健全人會學壞呢！」十多年前女兒的一番安慰說話，令余媽媽一直感動至今，即使不太贊成愛女轉打劍擊，心痛女兒手粗起「繭」，但多年來都在她背後默默支持，成就了一代「輪椅劍后」余翠怡。原來翠怡都曾經歷過反叛期，多得「嚴媽」的嚴厲管教，使這位屋邨少女變身「輪椅天使」，助她在體育舞台上發光發亮，成為當今獨攬最多奧運金牌的香港運動員。
雅典獨攬4金、北京奪1金1銀、倫敦贏得2金1銅，三屆殘奧累積7金1銀1銅的「輪椅劍后」余翠怡，自小在公屋長大，與父母及弟弟一家四口住在元洲邨，11歲罹患骨癌，接受化療後傷口發炎，因而要切除左腳小腿並裝上義肢。重提當年女兒被病魔折騰期間，要每天由長沙灣走到沙田威爾斯醫院，不禁勾起余媽媽很多辛酸回憶，然而，最令余媽媽感動的是翠怡切去了左腳後的一番說話：「我記得佢做完手術，我攬住佢喊，佢叫我唔好咁傷心，佢話依家冇咗隻腳，如果我係健全人，或者會學壞呢，我聽完喊得更多。」反而翠怡沒太記得自己說過這番令人動容的說話，但她坦言最怕就是媽媽流淚：「我真係好怕阿媽喊，唔知可以做乜，記得有次喺病房，佢突然喊，我當時覺得好尷尬，周圍啲人望住，以為係咪我曳，我咪同阿媽講，唔好喊啦，我會乖、會聽話o架喇。」
首次出賽全家Support
不過，性格好強的翠怡在運動路上，沒有聽從媽媽的話，堅決放棄游泳而選擇劍擊。「我唔鍾意佢打劍，佢嗰時啱啱做完手術，游水係四肢運動，可幫助佢恢復，劍擊就只係用手，我唔係想佢要出人頭地，只想佢身體可以盡快康復，或者我唔識啦，不過，佢話游水要同時間鬥，人又點能夠快過時間，反而劍擊面前有一個目標，贏係需要技巧，我哋冇意見，只要佢又唔係唔做呢份工，去賭場做，都係運動一種啫。」先後出席兩次殘奧（北京及倫敦）為愛女現場打氣的余媽媽講出心底話。
即使愛女已是當今劍壇天后，擁有七面殘奧金牌，但余媽媽對劍擊從來沒變，並沒有因當初的「唔識」變為「愛上」，她強調：「依家都唔會（愛上），只可以話係接受。」不過，她卻一直都在背後支持愛女，翠怡搶着補充：「我第一次比賽，屋企就畀咗六千蚊我買器材。佢哋把口話唔支持，但行動上就好Support，六千蚊雖然唔係大數目，但對我哋嚟講都唔係一個容易嘅數目，可知分分鐘一次比賽後就玩完，可能個面罩要用來做筲箕，呢筆錢可能就等於掟落大海，佢哋冇想過我往後嘅發展機會，或者我做得好唔好，但佢哋都願意付出。」可知十多年前6,000元對一個普通的公屋戶來說，已足夠一兩個月的生活費。
那次是翠怡首次代表香港，到意大利出戰世界盃，而她沒有辜負家人的支持，發揮潛能奪得兩面銀牌，並展開了她的光輝歲月。但原來這位「輪椅劍后」在少女時代也曾反叛過，常與媽媽頂嘴，令雙方關係曾一度僵持，翠怡憶述：「青年人到十幾歲，好多時都會反叛，初中時以為自己已經長大，想多啲自由度，自己有話事權，所以好多時同阿媽都有衝突、會頂撞，想約同學仔去街，要向阿媽匯報，阿媽覺得放學就要返屋企，佢會覺得着住校服喺條街度流連，就唔啱，好似冇家教，當時覺得阿媽好囉唆。」
細個適當體罰有需要
對於翠怡的反叛，余媽媽覺得是孩子成長的一個歷程，但作為母親就一定要從旁管教：「我對佢哋好嚴格，細個做得唔好我會體罰，記得佢有一次畫牆，畀我打得好厲害，佢哋寫字唔整齊我會全部擦晒，要佢哋寫過。現在很多家長主張講道理，我唔係反對，但適當嘅體罰係有需要，但上到中學就唔可以再打，佢哋會反抗，先幾年佢成日都會頂嘴、拗頸，近幾年大家少咗磨擦，可能傾多啲，講多啲，關係緩和很多。」
隨着歲月流逝，病魔、心魔亦統統遠離，翠怡早已踏上成功路。雖然愛女今年已經28歲，但余媽媽仍然每天都要提點着，怕她行差踏錯：「又唔知佢群埋咩人，依家都擔心o架，雖然大個，都怕佢學壞，怕佢被利用，畀人呃，新聞都有報道啦，貪靚去打針，咁就死咗喇，有時人會麻木o架。」
「養兒一百歲 長憂九十九」這是母親的心聲！
我記得佢做完手術，我攬住佢喊，佢叫我唔好咁傷心，佢話依家冇咗隻腳，如果我係健全人，或者會學壞呢，我聽完喊得更多。
劍后Q&A
Q：三屆殘奧，邊屆你最難忘、7面金牌最鍾意邊一面？
A：我好鍾意喺北京嘅「金鑲玉」，好特別又靚，而最難忘嘅就係今屆倫敦嘅花劍A級賽金牌，因為嗰面金牌係落後下反勝贏番嚟嘅。
Q：你嘅人生到呢一刻，最難捱係邊段時間？
A：化療。嗰段時間係最辛苦，會成日嘔，抵抗力又差，身體好弱，後來傷口出現排斥問題，要成日洗傷口，我覺得係麻煩囉。
最鍾意紅髮「耶娃」
Q：其實你細個有冇想過自己會做乜？
A：有想過做警察、做老師，細個成日同表妹、細佬玩扮老師，細佬差唔多每次都係做學生，我同表妹就輪流扮老師，但真係冇想過會做運動員，即使當初玩劍擊時，都冇諗過會有乜嘢成就。
Q：細個最鍾意嘅玩具係乜?
A：我細個好鍾意一個耶菜娃娃，但畀阿媽揼咗，我好記得係紅色頭髮，我由細到大都攬住佢，後來阿媽話揼咗，我喊咗好耐，（有冇嬲阿媽？）梗係有啦！
Q：依家點解鍾意「三眼仔」？
A：其實係見到好多朋友去旅行，都會帶一隻公仔影相，所以我都想搵一隻。我覺得佢好得意，同埋特別一啲。
Q：平日除咗打劍，最鍾意做乜？
A：行街Shopping，乜都鍾意買。
Q：如果將來退休，你會唔會做教練呀？
A：唔會，因為做教練唔係簡單嘅事，唔係識打就可以教人，做教練基本上似打雜，又似經理人。
圖 ／文：Kin、李芷韻