今屆倫敦奧運令人印象深刻場面，除保特同菲比斯奪金外，羽毛球賽事都出現唔少經典。林丹嘅「奪金狂奔」一幕大家固然記憶猶新，仲有中國女雙組合走線打假波，觸發唔少評論深思，國際羽聯嘅曝光率首次壓過國際足協。林丹奧運奪金後需要休養生息，宣布告假半年擺酒結婚度假，點知國際羽聯喺度詐晒型，連休息都唔畀，莫非國際羽聯裏面都有個白禮達？
原來國際羽聯有個規定，就係世界排名前八名嘅球手，必須無條件參加頂級賽事，唔參賽就至少要罰款5000美元，仲話就算有傷，只要仲行得走得，都要去比賽現場協助宣傳。呢啲咁嘅規定，都唔知邊個領導人如廁嗰陣諗出嚟，一個人唔想打波，你硬係要逼佢打，佢為咗應酬你惟有hea打，之後你又罰佢唔盡力比賽，仲慘過偉仔嗰套《黑獄斷腸歌之砌生豬肉》。
林丹已經贏咗兩屆奧運金牌，今年廿九歲，好話唔好聽已經將近收山，就算唔退役都係周身傷嗰隻，根本應付唔到所有頂級賽事，勉強去打就大家冇癮。倘若林丹hea打，又或者頭兩圈就出局，咁即係搵買飛入場嘅觀眾笨。當日國際羽聯指控四對奧運女雙打假波走線，罪名之一亦係「搵觀眾笨」，但依家又用另一規定，逼高排名球手現身嘅方法搵觀眾笨，咁算點先！
中國隊今次又醒喎，原本佢哋諗咗條更絕嘅橋，用以應對國際羽聯嘅規定，就係宣布林丹「暫時退役」，跟住喺半年後復出，但經過女雙事件後，國家隊決定做誠實嘅好孩子有碗話碗。放假無罪，結婚有理，唔通咁都要食國際羽聯嘅牛肉乾？