湖人貫徹「唔贏波」劣績，除咗新舊球員打來格格不入外，教練米克布朗未能駕馭「４條煙」係主要敗筆，如果呢個陣型唔快啲改變，我估計打多幾場米克布朗有機會被炒魷。
作為教練，我成日同學員分析，喺「100分進攻架構」內，兩分約佔一半、３分波大概二十巴仙、罰球大概十五至二十巴仙、而快攻都係十五至二十巴仙。從這架構去睇，湖人對住小牛有五十巴仙嘅兩分波，攞到「Ａ」，但係３分波Kobe、拿殊、「慈善世界和平」都冇表現，快攻亦不濟，罰球方面好似杜域侯活亦只有14中３，這３個欄目只有「Ｂ」級或以下。好勝心強嘅Kobe夾硬出場，我唔感到意外，但佢自己有自己打；杜域侯活同加素在低位又配合唔到，內部矛盾顯而易見。由季前賽至常規賽「９連敗」，再係咁落去，喺湖人讓分一向偏高之下，捧下盤係明智選擇。
強隊教練唔易做，米克布朗以往執騎士帥印，被指是「大帝」一人球隊，展現不到教練嘅風範。如今喺「４條煙」嘅湖人，佢嘅執行能力再出現問題。我認為，湖人要贏波，就要找到釋放Kobe得分能力嘅陣型；如果要換帥，我心目中前紐約人教練迪安東尼、或「千勝教練」拉利布朗都係合適人選，因喺粒粒皆星嘅球隊，一定要有名宿「鎮」住，凝聚各人，發揮整支球隊嘅戰鬥力。或者以Kobe熟悉嘅三角戰術，釐清得分重心，先有望不重蹈04年同樣雷聲大，但最終失敗嘅歷史。
蔡芳裕