湖人F4打亂章輸畀小牛
【本報綜合報道】NBA新季首日另一場焦點賽事由西岸雙雄對決，結果有「F4」正選上陣嘅湖人，主場竟以91比99不敵天殘地缺嘅小牛，令人大跌眼鏡，今場敗仗亦令睇落甚為完美嘅「F4」變得風雨飄搖。
由於係湖人今季首場主場賽事，所以吸引唔少體壇知名人士及荷里活明星成為座上客，包括踢緊美職球隊銀河嘅「萬人迷」碧咸同隊友羅比堅尼，另外前湖人名宿、「魔術手」莊遜亦有入場睇波。
賽事開打前數小時，高比拜仁仍未確定能否出戰小牛，其右腳踝仍受傷患困擾。不過，面對有魯域斯基同卡文缺陣嘅小牛，為咗能結束季前賽八連敗嘅尷尬，高比決定正選上陣帶領球隊爭取首場勝利，只可惜最終事與願違。
連季前賽9連敗
帶傷上陣嘅高比拜仁攻入22分，命中率更是高達78.5%，表現實在非常好，不過球隊攻守兩方面皆出現問題，其中罰球命中率只有38.7%可說是致命傷。新加盟嘅中鋒「魔獸」杜域侯活手風認真唔順，是役狂炒11個罰球，另一新加盟嘅球星拿殊又未能融入球隊進攻體系，結果被小牛的機動打法擊潰，湖人連季前賽已連輸九場，真係冇晒「飛士」！