朗尼出自傳冇人吼，呢位曼聯射手第二本自傳《My Decade In The Premier League》上架六星期以來，只係賣出六千本，遠差過市場預期，淪為倉底貨。出版商見到都驚，準備打退堂鼓，提前終止雙方簽下嘅500萬鎊（約6,200萬港元）出書合約。朗尼喺電子遊戲「FIFA13英國」嘅封套人物，亦被美斯、赫特及阿歷士張伯倫取代，睇來佢需要請專家，幫手重新包裝形象救亡。
朗尼出道十年，並於上仗聯賽取得第二百個球會賽事入球，但未能挽救自傳《My Decade In The Premier League》銷情，有傳出版商見唔對路，可能提早終止2018年到期嘅合約，希望止蝕離場。雙方曾經簽下一份為期十二年合約，為朗尼出版五本書，但現時僅出到第二本，已經有爛尾危機，可見出版商都唔睇好朗尼將來嘅商業價值。
事實上，朗尼早前已被美斯、赫特及阿歷士張伯倫搶走「FIFA13英國」封套人物，加上今次自傳滯銷，可謂屋漏兼逢連夜雨。有專家指，朗尼市場價值唔及C朗、美斯及碧咸等球星，除咗唔夠靚仔之外，佢以往喺場外，包括召妓醜聞嘅負面新聞，亦係死因之一，要重建一個健康形象並唔容易。