ＮＢＡ球季即將展開，季前成功搶得林書豪嘅火箭並未收手，據美國媒體報道，火箭已加入爭奪雷霆「最佳第６人」占士夏登，希望可以得到呢位「大胡子」加盟，依家呢位得分後衞遲遲未與雷霆續約，若果今個月內仍未達成續約協議，雷霆為免明年目送占士夏登自由轉會，亦會同意進行交易，不過小牛及太陽均表示興趣，火箭要撮合J.Lin+占士夏登嘅組合絕對唔容易。
雷霆受到占士夏登去留問題困擾，另一爭標熱門熱火就全力備戰，尋日季前賽「大帝」勒邦占士休戰，但佢哋主場仍以104:101擊敗馬刺，老將劉易斯取得15分係全隊最高。「閃電俠」韋迪賽後透露熱火今季將會採用快攻戰術，減少使用陣地戰，同時指勒邦占士有意過檔湖人嘅傳聞更係無中生有。